ئەو هەڵانەی کە هەندێک لە حاجیان تێی دەکەون

١ ـ هەڵەی ئیحرام:
أـ حاجی نابێ بەبێ ئیحرام ( میقات ) جێ بهێڵێت. هەتا ئەگەر لەناو فڕۆکەش بوو یا زووتر ئیحرامەکەی بەستبێ یا بەگەیشتنی بۆ سەر یەک لە میقاتەکان دەبێ یەکسەر بیبەستی.
ب ـ هەندێک لە پیاوان لەگەڵ ئیحرام کردندا شانی لای ڕاستیان ڕووت دەکەنەوە (اضطباع) ئەوە جایز نیە، چونکە (اضطباع) هەر لە حاڵەتی تەوافی( قودوم ـ عومرە) دەبیت.
ج ـ هەندێک لە ئافرەتەکان وا دەزانن دەبێ جلی ئیحرام ڕەنگی تایبەتی هەبێ، ئەوە هەڵەیە چونکە ئافرەتان جلی ئیحرامیان ئەو جلانەی خۆیانە کەلەبەریاندایە بە شەرتێک شەرعی بێت

٢ ـ هەڵەی تەواف:
ا ـ زۆربەی حاجی یەکان کتێبێکی دوعا بەدەستەوە دەگرن لە کاتی تەوافدا و دەی خوێننەوە و جاری واش هەیە کۆمەڵێک خەڵکیان لەگەڵدایە ئەو دوعایانە دووبارە دەکەنەوە کە ئەو بەدەنگی بەرز دەیخوێنێ ئەوەش جایز نی یە چونکە..یەکەم.. لە پێغەمبەرەوە () نەهاتوە کە دوعای تایبەتی خوێندبێ لە کاتی تەواف..دووەم..دوعای جەماعی بیدعەیە، و سەر لەخەڵکی دیکە دەشێوێنێ. بۆیە ئەوە باشترە کە هەرکەس بۆخۆی دوعا بخوێنێ بەبێ دەنگ بەرز کردنەوە.
ب ـ کەسانێک ئەزیەتی خۆیان و خەلکی دیش دەدەن لە پێناوی ئەوەی بگەنە بەردە ڕەشەکە بۆ ماچ کردنی یا دەست لێدانی.
ئەگەر قەڕەباڵغی هەبوو ئەوە هیچ پێویست ناکات ئەزیەتی خۆی و خەڵکی بدا بەڵکو هەر لەدوورەوە دەست بۆ بەردە ڕەشەکە بڵند بکات کیفایەتە. چونکە ماچ کردن و دەست لێدانی بەردەکە نە روکنە نە واجیبە.

٣ ـ هەڵەی سەفا و مەروە:
بەپەلە ڕۆیشتن تەنهانێوان دوو میلە سەوزەکەیە، نەک هەموو ڕیگەکە وەک هەندێک لەحاجی یەکان دەیکەن.

٤ ـ هەڵەکانی وەستان لە عەرەفە:
أـ هەندێک لە حاجی یەکان ئاگایان لە شوێنی وەستانیان نی یە، ئایا لەناو سنووری (عەرەفە)ن یانا! چونکە ئەگەر لەدەرەوەی سنووری عەرەفە بن ئەوە حەجەکەیان دروست نی یە.
ب ـ هەندێک وادەزانن ئەگەر نەچن بۆ کێوی ڕەحمە یاخود چاویان لێ نەبێت حەجیان قەبوڵ نابێت.
نەخێر وا نیە بەڵکو هەموو عەرەفە جێی وەستانە بە شەرتیک لە سنووری عەرەفە دەرنەچن.
ج ـ هەندێک عەرەفە بەجێ دەهێڵن و دەڕۆن بۆ موزدەلیفە پێشی خۆرئاوابوون. ئەوەش نابێت بەڵکو دەبێ دوای خۆرئاوابوون عەرەفە جی بهێڵن.

٥ ـ هەڵەکانی موزدەلیفە:
پێویست ناکات لەحەوت بەرد زیاتر کۆبکرێتەوە لە موزدەلیفە بۆ ڕەمی (جەمرات).

٦ ـ هەڵەکانی کاتی ڕەمی (جمرات):
بۆ ڕەمی کردن دەبێ بە تەرتیب بکرێ: ١ـ ألصغرى ٢ ـ ألوسطى ٣ ـ ألكبرى.
وەناشبێ هەموو بەردەکان بەکۆمەڵ فڕێ بدرێت لەو حاڵەتە بەیەك بەرد حیساب دەکرێت.

٧ ـ دوای تەوافی ماڵ ئاوایی دەبێ یەکسەر مەککە بەجێ بهێڵێ.

٨ ـ هەڵەکانی سەردانی مەدینە:
لەسەردانی هەر گۆڕێک یا گۆڕستانێک، ئاگات لەئادابی گۆڕستان بێت و نەکەیت بەدەر لە خودا بپاڕییتەوە و بیکەیتە تکاکارت.

والله تعالی اعلم وصلى الله وسلم علی نبینا محمد وعلی اله وصحبه